Bakıdakı sıxlığın və hava çirkililiyinin artması ilə birlikdə universitetlərin paytaxtdan kənar ərazilərə köçürülməsi fikri hər il aktuallaşır. Milli Məclisin deputatı Vüqar İskəndərov parlamentdə noyabrın 14-də keçirilən plenar iclasında “Azərbaycan Respublikasının 2024-cü il dövlət büdcəsi haqqında” qanun layihəsinin müzakirəsində bu ideyanı yenidən səsləndirib. Bəs bu təhsil ocaqlarının kənar rayonlara köçürülməsi prosesi düşündüyümüz qədər asandırmı? Mövzu ilə bağlı Sosial Tədqiqatlar Mərkəzinin tədqiqatçısı Elmin Nuri azmedia.info.az-ın suallarına aydınlıq gətirib:

“Bakıdakı ali təhsil müəssisələrinin paytaxtdan kənar ərazilərə köçürülməsi təklifi demək olar ki, hər il verilir. İldə bir neçə dəfə bu məsələ gündəmə gətirilsə də, göründüyü kimi, dəyişən nəsə yoxdur. Mahiyyət etibarilə faydalı, dünya ali təhsil meyarları ilə səsləşən bir ideya olsa da, onun praktiki tərəfi həddindən artıq mürəkkəb bir mexanizmdir. 

Hər bir universitet özü bir çox hissədən ibarətdir. Onu köçürmək elə binanı, qərargahı dəyişmək deyil. Onun texniki avadanlıq, infrastruktur tələbləri var. Professor, müəllim, texniki heyətin formalaşdırılması və digər onların tələblərini ödəmək şərtləri var. Ən əsası, böyük bir kampus və kampusun dünya standartlarla ayaqlaşmaq meyarları var. Bütün bunları nəzərə alaraq deyə bilərik ki, hazırda bizdəki universitetlərin kənar rayonlara köçürülməsi inandırıcı deyil. 

Düzdür, təhsil müəssisələrinin paytaxtdan kənar əraziyə daşınması Bakıda tıxacları azaldacaq, həmin rayonda iqtisadi imkanları genişləndirəcək. Amma bir neçə səbəb var ki, bu addım real görünmür.

Buna səbəb kimi kampus və yataqxana imkanlarını nəzərə almaq olar. Bildiyimiz kimi, əgər bir universitet rayona köçürüləcəksə, onun mütləq kampusu-şəhərciyi olmalıdır. Burada tələbələr üçün mağazalar, əyləncə guşələri, kafe və restoranlar açılmalıdır. Universitet tək fəaliyyət göstərə bilməz. Tələbəlik ömrün ən gözəl illəridir. Nəyə görə Azərbaycan gənci bu zövqü dadmasın? Bu məsələ, həmçinin, professor-müəllim heyətinə də aiddir.

Bu təklifin reallaşması üçün hazırda görülə biləcək ilkin addım kiçik universitetlərin paytaxt daxilində kənar ərazilərə köçürülməsidir. Bunun bir çox nümunəsi var ki, Moskva Dövlət Universitetinin Bakı filialı da onlardan biridir”.