Azərbaycan Respublikası Elm və Təhsil Nazirliyinin Təhsildə inkişaf və innovasiyalar üzrə VII qrant müsabiqəsinin ümumtəhsil kateqoriyasının qalibi "First Goygol Robotics" layihəsi rəhbər olaraq Göygöl rayon Texniki və Təbiət Təmayüllü liseyin direktoru Zəhra Zeynalova, təlimçi olaraq liseyin STEAM -coğrafiya müəllimi Ləman Novruzova, eksperti olaraq Səltənət Qurbanovanın əməkdaşlığı ilə uğurla həyata keçirilən və qarşıya qoyulan hədəflərə çatan layihələrdəndir.
Layihənin İcra Planına müvafiq olaraq müdavimlər 3D dizayn, 3D çap, Microbit, Arduino, Kodlaşdırma, Lego kimi mövzularda keçirilən təlimlərdə qazandıqları bilikləri STEAM yönümlü yerli və beynəlxalq yarışlarda nümayiş etdirməlidirlər.
Edupress.az xəbər verir ki, SAF 2023 - Beynəlxalq STEAM Azərbaycan Festivalında layihənin müdavimlərindən ibarət 2 komanda təmsil etdi. “Galactic Power” komandasının üzvləri şəhid Ceyhun Niftəliyevin qızı Ayan Niftəliyeva, Aysel Məmmədova Mexatronika kateqoriyası üzrə respublika birincisi olaraq qızıl medal qazandı.
İnnovativ sərgi kateqoriyası üzrə isə “Young Engineers” komandasının üzvləri Nərmin Allahverdiyeva, Emin Allahverdiyev, Aysel Sadıqova qalib seçildilər. Hər iki komanda həmçinin "atractive team" xüsusi nominasiyası üzrə də mükafatlandırıldı.
2-3 mart tarixlərində “First Lego League Challange 2024" Azərbaycan turnirində layihə müdavimləri Leyla Abdullayeva, Səmayə Şahverdiyeva, Mehdi Abdullayev III yerə layiq görüldü.
Texnofest Türkiyə-2024 müsabiqəsində Sevinc Musayeva layihə ilə çıxış edib.
Müdavimlərin Dünya Robot Olimpiadasında iştirakı üçün məşqləri davam edir.
Qalib olan müdavimlərin mentorluğu ilə növbəti illərdə keçiriləcək müsabiqələrdə öz yoldaşlarına dəstək olub komanda halında iştirakları layihənin davamlılığını təmin edəcək.