ADPU-nun Quba filialında imtahanlar uğurla davam edir

   Hal-hazırda ölkəmizin bütün ali və orta ixtisas məktəblərində ilin ən çətin və məsuliyyətli dövrüdür desək, yanılmarıq. Tələbələr semestr və tədris ili ərzində əldə etdikləri bilikləri yaz imtahan sessiyasında nümayiş etdirir, qazandıqları bacarıqları sınaqdan keçirirlər. Qabaqcıl iş təcrübəsi ilə təkcə respublikamızda deyil,  artıq beynəlxalq miqyasda da şan-şöhrət qazanan Azərbaycan Dövlət Pedaqoji Universitetinin Quba filialında 2023/2024-cü tədris ilinin yay semestrinin yaz imtahan sessiyasına artıq bir neçə gündür ki, start verilib. Gələn ayın 2-dək davam edəcək imtahan sessiyasının yüksək səviyyədə keçirilməsi üçün bütün zəruri addımlar atılıb.

   Filialın direktoru, fizika elmləri doktoru, dosent Yusif Alıyevin tapşırığına əsasən, imtahanların obyektiv və mütəşəkkil qaydada keçirilməsi üçün bütün hazırlıq işləri görülüb. İmtahan sessiyasının mövcud tələblərə uyğun, o cümlədən imtahan cədvəlləri üzrə müəyyən edilmış qaydada və qrafikdə keçirilməsinə nəzarət etmək, imtahanlarla bağlı mövcud çatışmazlıqları operativ şəkildə təmin etmək məqsədilə İmtahan Qərargahı yaradılıb. Eyni zamanda, imtahan sessiyasında tələbələrin imtahan nəticələrinin qiymətləndirilməsindəki şikayətlərini araşdırmaq və düzgün qiymətləndirməni təmin etmək məqsədilə  Apellyasiya Komissiyası da yaradılıb. Daxil olan müraciətlərin daha obyektiv araşdırılması və təmin olunması bilavasitə filial rəhbərliyinin ciddi nəzarəti altındadır. İmtahan prosesinin operativ və şəffaf keçirilməsi məqsədilə təcrübəli nəzarətçi heyəti imtahan prosesinə cəlb edilib. Qeyd edək ki, yazılı və qismən şifahi formada keçirilən imtahanlarda cavabların yoxlanma qaydası çarpaz şəkildə təşkil edilmişdir. Yaz imtahan sessiyasının ümumilikdə 36 qrup, 168 fənn üzrə 2 növbədə keçirilməsi nəzərdə tutulub ki, bu imtahanlarda da  858  tələbə iştirak edir.

 Kamal Kamalov

ADPU-nun Quba filialının baş müəllimi,

Azərbaycan Jurnalistlər Birliyinin üzvü