Məktəblərdə şagirdlərə telefon qadağası: Olsun, olmasın?

Rusiya məktəblilərinə yeni tədris ilində dərsdə mobil telefondan istifadə etmək qadağan edilib.

Bakıvaxtı.az xəbər verir ki, bu barədə Rusiya prezidenti Vladimir Putin qanun imzalayıb.

İsveçdə də məktəblərdə smartfonları qadağan etməyə dair plan hazırlanır.Səhiyyə naziri Yakob Forsmedin sözlərinə görə, yeniyetmələr dərsdən xaric gündə orta hesabla 6 saat 30 dəqiqə telefon və ya planşet qarşısında vaxt keçirirlər:

"Bu da idmana, aktiv istirahətə sərf olunan vaxtın ciddi şəkildə azalması ilə nəticələnir, yuxusuzluq və digər depressiyaların yaranması ilə nəticələnir".

Azərbaycanda isə şagirdlərin dərs zamanı mobil telefondan istifadəsi hüqiqi cəhətdən qadağan edilməsə sə, bəzi məktəblərdə bu qadağa mövcuddur. Bununla belə, bəzi şagirdlər sinfə rahat şəkildə telefon aparırlar.

Bu, necə tənzimlənməlidir? Bunun qarşısını almaq üçün hansı addımlar atılmalıdır?

Mövzu ilə bağlı Bakıvaxtı.az-a açıqlama verən təhsil eksperti Elmin Nuri bildirib ki, Azərbaycan məktəblərində mobil telefonların istifadəsi hüquqi cəhətdən qadağan edilməyib.

E.Nuri qeyd edib ki, bu, bir çox məktəblərdə yalnız məktəb rəhbərliyinin, Pedaqoji Şuranın qərarı əsasında tənzimlənən bir prosesdir.

Elmin Nuri: Şagirdin məktəbə telefon gətirməsi qeyri-qanuni hal deyil

Onun sözlərinə görə, elm və təhsil naziri Emin Əmrullayev jurnalistlər üçün keçirdiyi brifinqdə də bir neçə dəfə bu məsələyə toxunub və hələ ki, rəsmi qadağanın olmadığını bildirib:

“Rəsmi qadağa olmadığı təqdirdə belə halların çox şahidi olacağıq. Rəsmi qadağa olmadığı üçün şagirdin məktəbə telefon gətirməsi o qədər də qeyri-qanuni hal sayılmır”.

Bunun mənfi hal olduğunu vurğulayan təhsil eksperti deyib ki, həm şagirdin tədris göstəricilərinə, həm psixologiyasına, həm zehzi müvazinətinə mənfi təsir edən bir detaldır.

Müsahibimiz mobil telefonun təkcə tərkibindəki maraqlı funksiyalar, oyunlardan ibarət olmadığını söyləyib və diqqətə çatdırıb ki, bunun bilmədiyimiz bir çox mənfi təsirləri var ki, daha çox uşaq və yeniyetmə yaşlılarda təzahür edə bilir:

“Artıq dünyanın bir çox ölkələrində, xüsusən də Avropa ölkələrində, hətta Amerikada belə orta məktəblərdə mobil telefonların istifadəsi qadağandır. Bizdə bəzi özəl liseylərdə, həmçinin Nazirliyin tabeliyində olan xüsusi təmayüllü liseylərdə bu qadağaya gedilir. Amma sıradan orta məktəblərdə rəsmi olaraq belə bir qadağa yoxdur. Ona görə də müəllim bununla bağlı şagirdə bir söz deyə bilmir. Düzdür, onun buna mənəvi haqqı olsa da, hüquqi haqqı yoxdur. Çox istərdim ki, mobil telefonlarla bağlı bir qərara gəlinsin. Bu çox vacib bir detaldır”.