Sertifikasiyadan yüksək bal toplayan yaşlı müəllimlərin müqaviləsi uzadılsın

Məlumdur ki, bəzi hallar istisna olmaqla, yaşı 65-ə çatan müəllimlərin əmək müqaviləsinə xitam verilir.

Bəs görəsən, əmək qabiliyyəti, sağlamlığı yerində olub sertifikasiya imtahanından yüksək bal toplayan şəxslərin əmək müqavilələri uzadılmalıdırmı?

Sosial Tədqiqatlar Mərkəzinin sektor müdiri, elm və təhsil məsələləri üzrə tədqiqatçı Elmin Nuri AzEdu.az-a açıqlamasında deyib ki, sertifikasiyadan 58-dən çox bal toplayan müəllimlərin əmək müqaviləsinin müddətinin artırılmasının tərəfdarıdır:

 “Sirr deyil ki, əmək qanunvericiliyinə görə bir çox sahələrdə və qurumlarda təqaüdə çıxma yaşı 65-dir. Təbii ki, burada  müəyyən istisnalar var. Elə yerlər var ki, orada çalışanların nəinki bir qismi, hətta böyük əksəriyyəti yaşlı şəxslərdir. Elə sahələr də var ki, əksinə yaşı 65-i keçmiş şəxsləri orada görə bilmərik.

 Ancaq yaşı 65-i ötən, müəllimlərin sertifikatlaşdırma imtahanından 58-dən çox bal toplayan əmək bacarığı və sağlamlığı normal olan müəllimlərin əmək müqaviləsinin müddətinin artırılmasının tərəfdarıyam.

 Ola bilər ki, müəllimlər üçün bu bal çox böyük və imkansız görünə bilər. Hətta: “Niyə məhz 56,57 yox, 58 baldan yuxarı?”,- deyə düşünə də bilərlər. 1 balla, 1 sualla insanların intellekti arasında fərq qoyulmur, amma nəzərə almalıyıq ki, bizdə 30-a yaxın pedaqoji kadr yetişdirən ali təhsil müəssisəsi var və bu univesitetlərdən hər il minlərlə gənc istehsalata, əmək bazarına qədəm qoyur. Onlar da işləmək, təhsil vermək istəyirlər.

Hər il müəllimlərin işə qəbulu (MİQ) müsabiqəsində yüksək bal toplamasına baxmayaraq, məhz vakant yerlərin azlığına görə bir çox gənc işsiz qalmalı olur. Məsələnin bu tərəfini də nəzərə alaraq, sertifikasiyada 58-60 bal aralığında nəticə göstərib, yaşı 65-i keçən şəxslərin əmək müqavilələri  1 yaxud 2 il  də artırıla bilər. Amma 51-58 arası nəticə göstərən yaşlı müəllimlərin artıq təqaüdə gedib, yerlərini gənclərə vermələri daha doğru addımdır. Çünki o müəllimlər çətin, ya asan əmək fəaliyyəti ilə məşğul olublar, ömürlərinin bəlli bir yaşına çatıblar. Gənclərimizin isə hər il xeyli hissəsi işsizdir.

10 minlərlə kadr böyük ümidlə MİQ müsabiqəsinə üz tutur, test və müsahibə mərhələsindən yaxşı bal toplayır, amma vakant yerə gələndə nə etməli olduqlarını bilmirlər”.