Sədaqət Novruzova – uğura aparan yolda əzmkarlıq nümunəsi-FOTOLAR

Sədaqət Novruzova Şahin qızı Bakı şəhəri Xəzər rayonu 117 nömrəli tam orta məktəbin 11-ç sinif şagirdidir. O, təhsil həyatına birinci sinifdən başlayaraq daim yüksək nəticələr göstərmiş, bütün fənlər üzrə yalnız “əla” qiymətlər alaraq məktəbin nümunəvi və çalışqan şagirdlərindən birinə çevrilmişdir. 9-cu sinfi qırmızı attestatla bitirən Sədaqət, həm də bilik və intizamı ilə müəllimlərinin və məktəb kollektivinin xüsusi rəğbətini qazanmışdır.

Hazırda I ixtisas qrupu üzrə ali təhsil almağı planlaşdıran Sədaqətin məqsədi – İnformasiya təhlükəsizliyi sahəsində ixtisaslaşaraq, ölkəsinin inkişafına töhfə vermək və gələcəkdə beynəlxalq arenada uğurlar əldə etməkdir. Onun fikrincə, bu sahədə yüksək bilik və bacarıqlara malik olmaq müasir dövrün tələblərinə cavab verən, strateji əhəmiyyətli bir istiqamətdir.

Məktəb illərində əldə etdiyi möhkəm təhsil bazası və ardıcıl çalışqanlığı nəticəsində ali məktəbə qəbul imtahanlarına hazırlıq prosesi onun üçün olduqca səmərəli və rahat keçmişdir. Hər zaman dərslərə məsuliyyətlə yanaşan Sədaqət, bu xüsusiyyətlərini gələcək akademik və peşə fəaliyyətində də davam etdirmək niyyətindədir.

Əzmkar, məqsədyönlü və bilikli bir gənc kimi Sədaqət Novruzova, gələcəyin savadlı mütəxəssislərindən biri olmağa layiq namizəddir.