.png)
Odlar Yurdu Universitetində Elmi Şuranın növbəti iclası baş tutmuşdur
Odlar Yurdu Universitetində Elmi Şuranın növbəti iclası keçirilmişdir. İclasa universitetin rektoru, professor Əhməd Vəliyev sədrlik etmişdir. Gündəlikdə yer alan məsələlərə keçməzdən əvvəl rektor iştirakçıları salamlamış, universitetin elmi-akademik həyatında baş verən yeniliklər və qarşıda duran vəzifələr barədə qısa məlumat verib.
İclasın birinci müzakirə mövzusu doktorantların doktorluq imtahanlarının təşkili məsələsi olmuşdur. Bu çərçivədə imtahanların keçirilməsi qaydaları, qiymətləndirmə meyarları və akademik prosedurların icra mexanizmləri geniş şəkildə müzakirə edilib.
Növbəti məsələ universitetdə pedaqoji heyətin fəaliyyətinin stimullaşdırılması məqsədilə müəllimlərin reytinqinin müəyyən olunması ilə bağlı olmuşdur. Təklif olunan meyarlar və metodoloji yanaşmalar Şura üzvləri tərəfindən təhlil edilmiş, bu prosesin tədris keyfiyyətinə və akademik motivasiyaya müsbət təsir göstərəcəyi qeyd olunub.
İclasın davamında 2024/2025-ci tədris ilinin yaz semestrinə dair imtahan sessiyasına hazırlıq vəziyyəti nəzərdən keçirilmişdir. Sessiyanın təşkili, qiymətləndirmə strategiyaları və tələbə nailiyyətlərinin obyektiv ölçülməsi istiqamətində görülən tədbirlər haqqında məlumat verilmiş, təkliflər səsləndirilib.
Müxtəlif məsələlər bölməsində bir sıra aktual mövzular diqqət mərkəzində olub.
2025-ci ilin 29–30 may tarixlərində keçirilməsi planlaşdırılan “Ağıllı ətraf mühit və yaşıl texnologiyalar” (ICSEGT-2025) adlı II beynəlxalq elmi konfransın hazırlıq prosesi müzakirəyə çıxarılmışdır. Konfransın elmi əhəmiyyəti, tərəfdaş qurumlarla əməkdaşlıq istiqamətləri və təşkilati işlərin icra vəziyyəti barədə ətraflı məlumat təqdim olunmuşdur.
Universitet daxilində nizam-intizam qaydalarına riayət olunması məsələsi müzakirə edilmiş, akademik mühitdə intizamın qorunması və tələbə-müəllim münasibətlərində məsuliyyətin artırılması istiqamətində təkliflər irəli sürülmüşdür.
“Biologiya və ekologiya” kafedrasının əyani doktorantı Oruczadə Əli Musa oğlunun “2406.02 – Biokimya” ixtisası üzrə dissertasiya mövzusunun adında dəyişiklik edilməsi və yeni variantın – “Azərbaycan ərazisində yabani halda yayılmış olan bəzi dərman əhəmiyyətli bitki ekstraktlarının antioksidant, antimikrob, sitotoksik və apoptotik xüsusiyyətlərinin tədqiqi” kimi təsdiqlənməsi məsələsinə baxılmışdır.
“Iqtisadiyyat və iqtisadi münasibətlər” kafedrasının əməkdaşları – professor E.Y. Məmmədov, dosent B.X. Feyzullayev və A.S. Vəliyev tərəfindən hazırlanmış “Azərbaycan iqtisadiyyatı” adlı dərsliyin müvafiq ixtisaslar üzrə tədris prosesinə daxil edilməsi təklif olunmuşdur. Həmçinin, Dillər kafedrasının dosenti, fəlsəfə üzrə fəlsəfə doktoru A.N. Qurbanova tərəfindən “Yazılı tərcümə” fənni üzrə hazırlanmış dərs vəsaiti təqdim edilmişdir.
Müzakirələr zamanı Elmi Şura üzvləri tərəfindən bütün məsələlərə dair elmi-pedaqoji və metodoloji aspektlərdən çıxış edən təklif və rəylər səsləndirilmiş, müvafiq qərarlar yekdilliklə qəbul olunmuşdur.
İclas, Odlar Yurdu Universitetində akademik fəaliyyətin davamlı inkişafı, elmi nailiyyətlərin stimullaşdırılması və beynəlxalq elmi inteqrasiyanın dərinləşdirilməsi istiqamətində həyata keçirilən məqsədyönlü və sistemli tədbirlərin növbəti təzahürü kimi qiymətləndirilmişdir.
