Hansı universitetdə yay imtahanları yaxşı təşkil olunub?

Dünəndən etibarən ali təhsil ocaqlarında 2024/2025-cü tədris ilinin yaz semestrinin yay imtahan sessiyası başlayıb.

Modern.az universitetlərlə əlaqə saxlayaraq, yay imtahan sessiyalarının təşkili ilə maraqlanıb.

Azərbaycan Texniki Universitetindən (AzTU) bildirilib ki, bakalavriat və magistratura (əyani) səviyyələrində yay imtahan sessiyası iyulun 5-də yekunlaşacaq. 
Qiyabi təhsil alanlar üçün imtahan sessiyası isə 10-16 iyun tarixlərini əhatə edəcək.

İmtahanlar əyani təhsil alan I və II kurslar üçün test, yazılı-elektron, III kurslar üçün şifahi və test üsulu ilə keçirilir. Qiyabi təhsil alan I, II, III, IV kurslar üçün imtahanlar test üsulla təşkil edilib.

Magistratura səviyyəsində isə imtahanlar şifahi üsulla keçirilir.

Sessiya zamanı üzrlü səbəblərdən imtahanda iştirak etməyən tələbələrə iyulun 10-dan 15-dək həmin fənlərdən imtahan vermək üçün şərait yaradılacaq.

Qeyd edək ki, sessiyanın gedişinə nəzarət, həmçinin şəffaflığın təmin olunması məqsədilə AzTU-da Apelyasiya Komissiyası, İmtahan Qərargahı və "Qaynar xətt" fəaliyyət göstərir.


Bakı Dövlət Universitetində (BDU) 2024/2025-ci tədris ilinin yay imtahan sessiyası 5 həftə ərzində davam edəcək.

Bakalavriat səviyyəsi üzrə imtahanlar yazılı və şifahi olmaqla iki növbədə (saat 10:00 - 13:00 və saat 14:00 - 17:00), magistratura səviyyəsi üzrə saat 14:00-dan 17:00-dək keçiriləcək.

Bakalavriat səviyyəsində 701 qrup üzrə 16000-dən çox, magistratura səviyyəsində 215 ixtisaslaşma üzrə 1175 magistrant imtahan verəcək. Müxtəlif səbəblərdən imtahanda iştirak etməyən təhsilalanlara həmin fənlərdən imtahan vermək üçün 2025-cü il iyul ayının 3-dən 7-dək şərait yaradılacaq.

“Sessiyanın gedişinə operativ nəzarət, tələbələrin biliyinin qiymətləndirilməsində şəffaflığı təmin etmək məqsədilə İmtahan Qərargahı və Apelyasiya Komissiyası yaradılıb. Komissiya sessiya müddətində imtahanların gedişi ilə əlaqədar ərizə, təklif, Elm və Təhsil Nazirliyinin "Qaynar xətt"i vasitəsilə daxil olmuş şikayətlərin araşdırılmasını təmin edəcək”, - BDU-dan bildirilib.
 

Azərbaycan Memarlıq və İnşaat Universitetindən (AzMİU) bildirilib ki, yay imtahan sessiyası iyulun 4-də yekunlaşacaq.

Dövlət imtahanları, buraxılış işləri və magistr dissertasiyalarının müdafiəsi isə 21 iyun–5 iyul tarixləri arasında keçiriləcək.

İmtahan sessiyası təsdiq olunmuş imtahan cədvəlinə əsasən magistratura səviyyəsində təhsil alan tələbələr üçün yazılı, şifahi və test üsulu ilə, bakalavr səviyyəsində təhsil alan tələbələr üçün isə yazılı, test və yaradıcılıqla bağlı fənlər üzrə fakültələrdə ənənəvi qaydada təşkil olunub.

İmtahanların təşkili, keçirilməsi və nəticələri ilə bağlı şəffaflığın təmin olunması üçün universitetdə bir neçə komissiya və qrup yaradılıb. Bunlara “İmtahan Qərargahı”, “İmtahanlara nəzarət qrupu” və “Münaqişə (apellyasiya) komissiyası” daxildir. Bu struktur vahidləri imtahanların obyektivliyinə nəzarət edəcək, tələbələrin imtahan nəticələri ilə bağlı müraciətlərini araşdıracaq və hər hansı neqativ halların operativ həllini təmin edəcəklər.

“İmtahan qərargahına və nəzarət qrupuna universitetin rəhbər heyətinin, fakültə və struktur bölmə rəhbərlərinin daxil olduğu təcrübəli mütəxəssislər cəlb olunub. Sessiya dövründə baş verə biləcək hər bir hal barədə dərhal reaksiya verilməsi və operativ araşdırma aparılması məqsədilə aidiyyəti şəxslər məlumatlandırılıb”, - universitetdən bildirilib.


Azərbaycan Dövlət Pedaqoji Universitetində (ADPU) də yay imtahan sessiyasına dünən start verilib.

İmtahan sessiyası prosesin effektiv təşkili və tələbələrin rahatlığının təmini məqsədilə, əsas tədris binasında (Sahil), xüsusi qabiliyyət tələb edən fənlər üzrə isə III tədris binasında təşkil edilir. İmtahanlar 09:00, 12:00 və 15:00-da olmaqla 3 növbədə təşkil edilir, yazılı və şifahi formalarda keçirilir.

Tələbələrin imtahan nəticələrinin qiymətləndirilməsində yarana biləcək şikayətlərin araşdırılması və düzgün qiymətləndirməni təmin etmək məqsədilə Apellyasiya Komissiyası və İmtahan Qərargahı yaradılıb. Tələbələr imtahanın bitməsindən növbəti 2 gün ərzində prosesin təşkili ilə bağlı müraciətlərini İmtahan Qərargahına, imtahan nəticələrindən narazı qaldıqda isə Apellyasiya Komissiyasına müraciət edə bilərlər.

ADPU-da yay sessiyası 4 iyulda yekinlaşacaq. Sessiyada 9344 bakalavr, 585 nəfər magistrant olmaqla ümumilikdə 10 min nəfərədək təhsilalanın iştirakı gözlənilir. Fənn kredit məbləğinin 25 %-ni ödəməklə təkrar imtahanlarının isə 7-9 iyul tarixlərində keçirilməsi nəzərdə tutulur.
 

Azərbaycan Dövlət İqtisad Universitetində (UNEC) yaz semestri üzrə yay imtahan sessiyası 2 iyun - 4 iyul tarixlərini əhatə edəcək. İmtahan mərkəzinin direktoru Tahir Bədəlov test üsulu və elektron yazılı imtahanların obyektiv və şəffaf keçirlməsi üçün bütün zəruri işlərin görüldüyünü deyib. O, imtahan testləri və imtahan cədvəllərinin tələbələrin şəxsi kabinetlərinə göndərildiyini, imtahanqabağı məsləhət saatlarının keçirilmə qrafiklərinin tərtib edildiyini, fakültələr üzrə imtahan komissiyalarının, eləcə də İmtahan Qərargahının yaradıldığını bildirib. Eyni zamanda imtahan zallarına texniki baxışın keçirildiyini və avadanlıqların işlək vəziyyətdə olduğunu qeyd edib.
Bu sessiya dövründən başlayaraq test üsulu ilə keçirilən imtahanlardan apelyasiya ərizələri qəbul olunmayacaq.
İmtahan sessiyası dövründə ənənəvi olaraq UNEC rektorunun hər həftənin şənbə günü “Açıq qapı” günlərinin keçiriləcəyi də bildirilib.

Bakı Slavyan Universitetində (BSU) 2024/2025-ci tədris ilinin yay imtahan sessiyasında 4292 tələbə üçün ümumilikdə 1509 imtahanın təşkili nəzərdə tutulub.

Azərbaycan Turizm və Menecment Universitetində (ATMU) 2024/2025-ci tədris ilinin yay imtahan sessiyası 5 həftə davam edəcək. İmtahanların bir hissəsi elektron imtahan otaqlarında, bir hissəsi isə digər imtahan auditoriyalarında saat 09:00-dan 17:30-dək davam edir.
Müxtəlif səbəblərdən imtahanda iştirak etməyən tələbələrə həmin fənlərdən imtahan vermək üçün 2025-ci il iyul ayının 1-ci həftəsində şərait yaradılacaq.
Sessiyanın gedişinə operativ nəzarət, tələbələrin biliyinin qiymətləndirilməsində şəffaflığı təmin etmək məqsədilə İmtahan Qərargahı və Apellyasiya Komissiyası yaradılıb. Komissiya sessiya müddətində imtahanların gedişi ilə əlaqədar ərizə, təklif və şikayətlərin araşdırılmasını təmin edəcək.


Azərbaycan Dillər Universitetində yay imtahan sessiyası 5 həftə müddətinə əyani formada keçiriləcək.
İmtahanlar hər üç korpusda səhər saat 09:00-dan, Magistratura şöbəsində axşam saat 20:00-a qədər davam edir. Hər gün orta hesabla 1000 tələbə imtahan verir. İmtahanlar arası müddət minimum 2 gün, imtahanlara ayrılmış vaxt 2 saatdır.