"Hər yanlış suala görə abituriyentə 50 bal əlavə verilsin" - Ekspertdən DİM-ə TƏKLİF

İyun ayının 1-də 1-4 qruplar üçün blok imtahanının birinci mərhələsi keçirilib. Azərbaycan və rus bölməsi üzrə riyaziyyat fənnindən 1 sualda texniki səhvə yol verilib. Məleykə Abbaszadənin rəhbərlik etdiyi Dövlət İmtahan Mərkəzindən isə bildirilib ki, həmin sual üzrə şagirdlərin xeyrinə qərar qəbul ediləcək.

Bəs burada əsas məsələ sualın şagirdlərin xeyirinə həll olunmasıdırmı?

Redaktor.az-a danışan təhsil eksperti Elmin Nuri bildirdi ki, Riyaziyyat fənninə aid bir sualın yanlışlıqla test tapşırığı kimi təqdim olunması və bunun sonradan etirafı yolverilməz hadisədir.

"Doğrudur, kimlərsə düşünə bilər ki, bu da bir insanlıq halıdır, təqdim olunan yanlış sual da insan faktorundan qidalanıb, yoxlamadan keçirilib. İnsan amilinin olduğu bir yerdə irili-xırdalı hər hansı səhvin baş verməsi da normal haldır. Ümumilikdə bu düşüncə ilə razılaşırıq, amma gəlin baxaq, burada söhbət on minlərlə abituriyentdən və onların sayından ən azı 2 dəfə çox olan valideyn və müəllim kəsimindən gedir".

Ekspert bildirdi ki, pərdəarxası bəzi incə məqamları təhlil etməliyik.

"Birincisi, bilirik ki, abituriyent kəsimi çox həssas olur və bu həssaslıq imtahan prosesi zamanı daha çox üzə çıxır. Yanlış təqdim olunan sual nümunəsi imtahan zamanı abituriyentdə nəticəsizlik, sonuca vara bilməmək mesajını ötürür və o psixoloji dayanıqlığına ağır zərbə vurur. İkincisi, bu mərhələdən başlayaraq artıq onda fokuslanmanın pozulması halları başlayır və bu getdikcə diqqətin paylanmasını, pozulmasını sürətləndirir. Belə olan halda isə abituriyent ona təqdim olunan məhdud zaman çərçivəsində məntiqi ipin ucu itirərək böyük bir xaosun içinə düşmüş olur. Nəticədə isə arzuolunmaz sonluq, zəif bal göstəricisi ilə qane olur. 
Ən nəhayət, imtahan prosesində zamanın nə dərəcədə önəmli olmasından, hər saniyənin belə qızıla bərabər olmasından danışmaq əbəsdir".

Elmin Nurinin sözlərinə görə, bir sualın yanlışlığı digər suallarla bağlı ayrılan vaxt bölgüsünə çox ciddi təsir edir.

"Nəticədə zaman daraldıqca gərginliyi artan abituriyent sonlara yaxın tələsdiyindən daha ciddi səhvlərə yol verir. Odur ki, “cəmi bir sualda yanlışlıq var” deyib durmayaq. Bir sualın yanlışlığı həm bu, həm də digər səbəblərdən çox ciddi nöqsanlara gətirib çıxarır. Yalnız bir sualın abituriyentin xeyrinə həll olunması sırf yuxarıda dediyim səbəblərdən hər şeyin düzəlməsi anlamına gəlmir. Çünki dolayısı yolla, həmin yanlış sual özündən sonrakı sual tapşırıqlarının da aqibətini həll edir, iflic duruna salır. Təklif edirəm ki, bundan sonra sırf yuxarıdakı səbəbləri nəzərə almaqla, test tapşırıqlarında rastlanan hər yanlış suala görə abituriyentə 50 bal əlavə verilsin", - deyə müsahibimiz fikrini yekunlaşdırdı.