“Bilik günü” Bakının işğaldan azad olunduğu günə kölgə salır - Nadir İsrafilov

  • 18-05-2023, 09:16
Elm və Təhsil naziri Emin Əmrullayevin tədris ilinin sentyabrda başlaması ilə bağlı fikirləri müzakirələrə səbəb olub. Bəziləri buna tərəfdar olsa da, qarşı çıxanların da sayı çoxdur.
 
Mövzu ilə bağlı təhsil eksperti Nadir İsrafilov isə Bakupost.az-a açıqlamasında, bu sistemə keçidin gözlənilən və labüd olduğunu bildirib.
 
Onun sözlərinə görə, dərslərin 1 senyabrda başlaması milli olmasa da, uzun illərin sınağından çıxmış təcrübə idi:
 
"Bu ənənənin nə vaxtsa yenidən bərpa olunacağını, gec-tez belə bir addımın atıla biləcəyini istisna etmirəm. Təhsil ümumdövlət işi olmaqla yanaşı, həm də ümumxalq işidir, mmilli məsələdir. Dərs ilinin 15 gün geri çəkilməsi Dövlət İmtahan Mərkəzinin iş qrafikinə də təsirsiz ötüşməyib. İmtahanların daha erkən – mart, aprel aylarında keçirilməsi ilə əlaqədar narahatlıq və narazılıqlar bu gün də səngimək bilmir. Görəsən, uzun illərdən bəri alışdığımız ənənəvi “Bilik günü”nü 15 gün geriyə çəkməklə nəyə nail olduq? Bundan qazancımız və ya itirdiyimiz nə oldu? Nazirin dünənki çıxışı qərar və yaxud planlaşdırılmış dəyişiklik kimi başa düşülməsə də, hər halda geniş müzakirələr keçirmək və təhlillər aparmaqla məsələyə birdəfəlik nöqtə qoymaq olar”.
 
Təhsil eksperti bildirib ki, “Bilik günü”nün 15 sentyabr tarixində olması bu tarixdə baş verən digər hadisələrə kölgə salır:
 
“Üç variantdan ən optimal hesab edilən biri - əvvəlki (1sentyabr - 25 may); indiki (15 sentyabr - 15 iyun) və nazirin təklif etdiyi (1 sentyabr - 15 iyun) seçilib, Elm və Təhsil Nazirliyi tərəfindən Nazirlər Kabinetinə təqdim edilməlidir. O da nəzərə alınmalıdır ki, nazirin məqbul hesab etdiyi variantda tədris ili daha 2 həftə uzadılmış olur. Mənim fikrimcə, dərs ili sentyabrın 1-dən başlamalıdır. Çünki “Bilik günü”nün “Bakının işğaldan azad olunduğu gün”lə eyni günə salınması, Qafqaz İslam Ordusu və Azərbaycan Korpusu tərəfindən Bakının erməni-bolşevik işğalından azad edilməsi və Azərbaycanın müstəqilliyinin təmin edilməsi kimi bir tarixi hadisənin üzərinə kölgə salır”.