“Turan Balabilgə Akademiyası” fəaliyyətə başlayıb

Yanvarın 17-də Hədəf STARS kampusunda “Turan Balabilgə Akademiyası”nın fəaliyyətə başlaması münasibətilə təqdimat mərasimi keçirilib.

Akademiyanın elmi katibi, tarix üzrə fəlsəfə doktoru Elvin Əliyev bildirib ki, “Turan Balabilgə Akademiyası” Birinci Türkoloji Qurultayın 100 illiyi ərəfəsində-2025-ci il dekabrın 5-də Hədəf Liseyində təsis edilib. Türk dünyasının ortaq tarixi, dili, mədəniyyəti və elmi irsinin qorunması və təbliği, eləcə də məktəblilər arasında akademik və mədəni əlaqələrin gücləndirilməsi məqsədilə yaradılan akademiyanın təsis konfransında Azərbaycanla yanaşı Türkiyə, Qazaxıstan, Özbəkistan, Qırğızıstan, Şimali Kipr Türk Cümhuriyyəti və digər ölkələrdən olan elm və ictimaiyyət nümayəndələri iştirak ediblər.

Elvin Əliyev mərasim iştirakçılarına “Turan Balabilgə Akademiyası”nın fəxri və qurucu üzvləri barədə də ətraflı məlumat verib.

Hədəf Şirkətlər Qrupunun qurucu direktoru, “Turan Balabilgə Akademiyası”nın prezidenti, filologiya üzrə fəlsəfə doktoru, dosent Şəmil Sadiq tədbirdə iştirak edən elm və ictimaiyyət nümayəndələrini, valideynləri, akademiyanın ilk balabilgələrini səmimi salamlayaraq onlara təbriklərini çatdırıb. O bildirib ki, milli kimliyinə bağlı, müasir düşüncəli, texnoloji biliklərə və mənəvi dəyərlərə malik türk gənci modelinin formalaşdırılması “Turan Balabilgə Akademiyası”nın əsas prioritetləri sırasındadır. Qeyd edilib ki, akademiya fəaliyyətini könüllülük, bərabərlik və akademik azadlıq prinsipləri əsasında həyata keçirir.

“Prezident İlham Əliyevin ‘Bizim ailəmiz Türk dünyasıdır’ tezisi əsas götürülərək tarixini bilən, gələcəyi quran, bəşəri elmə inteqrasiya olmağı bacaran nəsil yetişdirmək bizim həm ziyalı, həm də vətəndaşlıq borcumuzdur”, — deyən Şəmil Sadiq layihənin koordinatorları Gövhər Məhərrəmovaya və Səma Məstəliyevaya səmərəli fəaliyyətlərinə görə təşəkkür edib.

Türkiyə İqtisadi, Siyasi və Strateji Araşdırmalar Mərkəzinin (TESAM) xarici əlaqələr üzrə sədr müavini Talha Zeytinci çıxış edərək Hədəf Şirkətlər Qrupunun elm, təhsil və mədəniyyət sahəsində həyata keçirdiyi uğurlu fəaliyyətlərdən danışıb, Türk dünyasının birliyi, bilik və təhsildə güclənməsi istiqamətindəki təşəbbüslərə görə Hədəf Şirkətlər Qrupunun qurucu direktoru Şəmil Sadiqə minnətdarlığını bildirib.

Daha sonra “Turan Balabilgə Akademiyası”na balabilgələrin seçim prosedurları ilə bağlı slayd-təqdimat nümayiş etdirilib. Akademiyanın elmi rəhbərləri, bölmə rəhbərləri olan balabilgələr və iştirakçı üzvlər tədbir iştirakçılarına təqdim olunub. Bildirilib ki, akademiya 6 bölmə üzrə fəaliyyət göstərəcək. Üç aylıq kurs və təlimlərdən sonra məzunlara diplom və sertifikatlar təqdim ediləcək, onlar “Uşaq simpoziumu”nda iştirak hüququ qazanacaqlar. Akademiyanın fəaliyyətinin digər Türk dünyası ölkələrindən olan üzv və rəhbərlərin cəlbi ilə daha da genişləndirilməsi nəzərdə tutulur. Vurğulanıb ki, bölmələrin elmi rəhbərləri öz sahələri üzrə peşəkar elm və ictimai xadimlərdir.

Belə ki, “Fizika və Riyaziyyat” bölməsinin elmi rəhbəri Qalib Şərifov, “Kimya, Biologiya və Həyat Elmləri” bölməsinin elmi rəhbəri Fətəli Hüseynov, “Süni Zəka və Data Elmi” bölməsinin elmi rəhbəri Məmməd Məmmədov, “Maliyyə və biznes savadlılığı” bölməsinin rəhbərləri İlqar İbrahimov və Vasif Əliyev, “Tarix və Mədəniyyət” bölməsinin elmi rəhbəri Dilqəm Əhməd, “Yaradıcı yazarlıq” bölməsinin elmi rəhbəri isə Ramil Əhməddir. Balabilgələrdən Bətulə Abdulzadə “Kimya, Biologiya və Həyat Elmləri” bölməsinə, İbrahim Əzizli və Şəhla Xankişiyeva “Fizika və Riyaziyyat” bölməsinə, Araz Vəlizadə və Abbas Abdulzadə “Tarix və Mədəniyyət” bölməsinə, Əli Mirzəliyev “Süni Zəka və Data Elmi” bölməsinə, Murad Həsənli “Maliyyə və biznes savadlılığı” bölməsinə, İnci Sadiqova isə “Yaradıcı yazarlıq” bölməsinə rəhbərlik edəcəklər.

Mərasimdə çıxış edən elmi rəhbərlər təlim proqramları və planlaşdırma prosesi barədə məlumat verərək bu təşəbbüsün bilikli, vətənpərvər və məsuliyyətli gənclərin yetişdirilməsi baxımından mühüm əhəmiyyət daşıdığını vurğulayıblar.

Sonda xatirə fotosu çəkdirilib, elmi rəhbərlərlə əməkdaşlıq müqavilələri imzalanıb. Hədəf STARS kampusunun auditoriyalarında “Turan Balabilgə Akademiyası”nın təlimlərinə start verilib, ilk araşdırmalara başlanılıb.

Hədəf-Media