“Biz dünyanı dəyişə bilərik” - Orta Doğu Texniki Universiteti birincidir

  • 03-07-2023, 12:00
 
 
Məlum olduğu kimi, Böyük Britaniyanın Quacquarelli Symonds (QS) şirkəti dünyanın ən mühüm reytinqlərindən biri sayılan “2024-cü il Dünya Universitetləri Reytinqləri”ni açıqlayıb.
Dünyanın ən yaxşı 1500 universitetinin reytinqində Türkiyədən 10 universitet ilk 1000-liyə daxil olub.
Edupress.az xəbər  verir ki, ilk 500-lük siyahısında Orta Doğu Texniki Universiteti ( ODTÜ ) 336-cı yerdəykən, İstanbul Texniki Universiteti (İTU) 601-650-dən 404-cü yerə yüksəlib.
Ötən il ilk 500-lüyə daxil olan və 477-ci olan yeganə ali təhsil müəssisəsi olan Koç Universiteti bu il 431-ci yerdə qərarlaşıb.
Keçən il 561-570 aralığında olan Bilkent Universiteti 502-ci yerə, 701-750 aralığında olan Boğaziçi Universiteti isə 514-cü yerə yüksəlib.
2022-ci ildə 531-540 aralığında olan Sabançı Universiteti bu il 526-cı yerdə qərarlaşıb. İstanbul Universiteti, Hacettepe Universiteti, Ankara Universiteti və Yıldız Texniki Universiteti ilk 1000-də yer alan digər universitetlərdir. Rəqəmlər Türkiyə universitetlərinin qlobal mövqeyindəki tərəqqini göstərir.
Reytinqdə Türkiyə ali məktəblərinə liderlik edən Orta Doğu Texniki Universiteti müstəsna akademik qabiliyyət və potensial nümayiş etdirən yüksək keyfiyyətli tələbələri və magistr tələbələrini cəlb etməkdədir. Universitetin ciddi qəbul prosesi ODTÜ-yə qəbul olan tələbələrin seçdikləri sahələr üzrə yüksək nailiyyətlər əldə etmələrini təmin edir. Universitet tələbələr, müəllimlər və tədqiqatçılar arasında əməkdaşlıq mədəniyyətini inkişaf etdirir. Bu əməkdaşlıq mühiti öyrənmə təcrübəsini artırır və innovativ tədqiqat və düşüncə liderliyini təşviq edir.
Qeyd edək ki, ODTU QS-in fənlər üzrə (QS WUR by Subject) reytinqində 401-450, QS-in davamlı inkişaf reytinqində (Sustainability Ranking) 201-220, məzunların məşğulluq sıralamasında (Graduate Employability Ranking) 301-500 aralığında yerləşir.
Əlavə edək ki, 26 aprel 2022-ci ildə əsas şüarı “Biz dünyanı dəyişə bilərik” olan ODTU-nun 2023-2027-ci illəri əhatə edən Strateji İnkişaf planı qəbul olunub və cari ilin 1 yanvarından qüvvəyə minmişdir.
 
Oruc Mustafayev