İqlim dəyişimi ilə bağlı vacib layihə - Azərbaycanı təmsil edən universitetlər
Avropa İttifaqı tərəfindən maliyyələşdirilən #HORİZON2020 proqramı çərçivəsində icra olunan (Climate Campaigners) CAMPAİGNers layihəsində Azərbaycan və 14 xarici ölkədən (Türkiyə, Avstriya, Almaniya, Belçika, İsveç, Norveç, Fransa, Finlandiya, Yunanıstan, İtaliya, İrlandiya, Cənubi Afrika, Litva və Peru) olan universitet, şirkət, bələdiyyə və ictimai təşkilatlar iştirak edir. Ölkəmizi həmin layihədə Bakı Mühəndislik Universiteti (BMU) və Azərbaycan Dövlət Neft və Sənaye Universiteti (ADNSU) təmsil edir. Ümumilikdə, qeyd olunan ölkələr üzrə 30-dan çox təşkilat təmsil olunur.
Bildiyimiz kimi, iqlim dəyişikliyi və qlobal istiləşmə hazırkı dövrdə ən ciddi qlobal ekoloji problemlərdəndir. Bu problemin həlli üçün siyasətçilərin, şirkət və təşkilatların hərəkətə keçməsini gözləsək də, məsələnin həlli bütövlükdə cəmiyyətin üzərinə düşür.
Biz, vətəndaşlar olaraq bu həllin br hissəsi ola bilərik, təmiz və davamlı mühitin formalaşdırılmasında yaxından iştirak edə bilərik.
Beləliklə, CAMPAİGNers layihəsinin də əsas hədəfi iqlim dəyişikliyinin təsirlərinin azaldılması istiqamətində insanların aktiv iştirakına istiqamət verməkdir. Əsas hədəflərdən biri insanların günlük həyat tərzlərində müəyyən dəyişikliklər edərək, öz karbon emissiyalarını minimuma endirmək, enerjiden daha az istifadə, sudan istifadəyə qənaət, daha çox ictimai nəqliyyatdan istifadə və s. kimi fəaliyyətləri təbliğ və təşviq etməklə öz müsbət töhfələrini izah etməkdir. Hansı ki, bu nəticələr layihənin sonunda hesabat şəklində təqdim olunacaq və bu hesabat eyni zamanda bu sahə ilə qərarvericilərin işini də asanlaşdıra biləcək.
Yuxarıdakıları nəzərə alaraq layihə əsasında proqram təminatı (mobil tətbiq) qurulmuşdur. “Climate Campaigners” adlı mobil tətbiq “Campaigners” layihəsində təmsil olunan 30-dan çox təşkilatının aid olduğu ölkələrin dilində, o cümlədən Azərbaycan dilində hazırlanmışdır. Sözügedən mobil tətbiqin təkmilləşdirilməsi prosesi davam etsə də, hazırda onu “Play Store” və “App Store” platformasından endirərək, istifadə etmək mümkündür.
Edupress.az xəbər verir ki, proqram təminatının əsas hədəfi istifadəçilər tərəfindən nəqliyyat, qida, enerji və istehlak sahələri üzrə seçilmiş hədəflər əsasında karbon ayaq izinin hesablanmasıdır. Bu, istifadəçilərin əsasən hansı sahələrdən ətraf mühitə təsir etdikləri müəyyən etməyə imkan verir. Bununla da, proqramda seçilmiş hədəflər sayəsində karbon ayaq izimizi azaldaraq qlobal istiləşmənin və iqlim dəyişmələrinin qarşısının alınmasına töhfə vermiş olarıq.
Proqram təminatını yüklədikdən sonra qeydiyyatdan keçirsiniz, eyni zamanda ölkəni və yaşadığınız şəhəri seçirsiniz. Burada, sizə 4 istiqamət (nəqliyyat, qida, enerji, istehlak) üzrə hədəflər təklif olunur. Hədəflərin icra müddəti dəyişkəndir (əsasən bir və ya iki həftə). Proqram təminatında hədəfləri seçdikdən və icra etdikdən sonra hədəfi necə icra etdiyiniz haqqında məlumat daxil edirsiniz. Proqram sizin həm aylıq, həm də illik karbon ayaq izinizi hesablayır və eyni zamanda hədəfləri icra etməklə nə qədər karbon ayaq izinizi azalatdığınızı da nümayiş etdirir. Hədəfləri icra etməklə siz xallar (coins) qazana bilərsiniz, hansı ki, bu xalları daha sonra alış-verişdə istifadə edə bilərsiniz (hələ ki, bu xallarla ancaq layihənin loqosu olan köynəkləri almaq mümkündür, amma, yaxın gələcəkdə daha geniş sahələrdə tətbiq olunacağı planlaşdırılır).
CAMPAİGNers layihəsi haqqında ətraflı məlumatı layihənin rəsmi veb səhifəsindən əladə edə bilərsiniz:
“Climate Campaigners” adlı mobil tətbiqi isə “play marekt”dən endirərək istifadə edə və ya tanış ola bilərsiniz.
Qeyd edək ki, “Climate Campaigners” adlı mobil tətbiq və onun işləmə prinsipləri haqqında 21 İyul 2023-cü il tarixində saat 21:00-da onlayn vebinar keçiriləcəkdir. Vebinar facebook səhifəmizdən canlı yayımlanacaq.