5 mart 2023-cü il tarixində Dövlət İmtahan Mərkəzi tərəfindən Bakı şəhərinin Qaradağ, Binəqədi, Xətai, Suraxanı, Pirallahı, Yasamal rayonlarında, Sumqayıt, Gəncə (I zona), Şirvan, Lənkəran, Yevlax, Şəki, Naftalan şəhərlərində, Goranboy, Göygöl, Şəmkir, Gədəbəy, Hacıqabul, Neftçala, Salyan, Göyçay, Kürdəmir, Ağdaş, Ağsu, Ucar, Masallı, Astara, Bərdə, Tərtər, Oğuz, Qəbələ, Xaçmaz, Siyəzən, Xızı rayonlarında, Çilov adasında yerləşən 131 nömrəli tam orta məktəbdə, eləcə də tədrisi ingilis və fransız dillərində aparılan ümumtəhsil müəssisələrinin məzunları üçün buraxılış imtahanı keçirildi.
İmtahanda riyaziyyat fənni üzrə bir sualın səhv salınması ilə bağlı məlumat, sosial şəbəkələrdə geniş müzakirələr səbəb oldu.
Mövzu ilə bağlı Moderator.az-a danışan xətai rayon 261 saylı məktəbin riyaziyyat müəllimi Famil Ağayev yanlış düşən sualı izah etdi:
“İlk olaraq, məsələnin şərtinə diqqət yeirək:
“M”in hansı qiymətində A(m+1; m+6); B(m+5; m-4) nöqtələri “3x+2y=26” şərtinə nəzərən simmetrikdir. Əgər iki nöqtə bir düz xəttə nəzərən simmetrikdirsə burda 2 şərt ödənməlidir: bu iki nöqtədən keçən düz xətt 2x+2y=26 düz xəttinə perpendikuliyar olmaldıır: bu düz xəttin üzərində elə bir nöqtə olmalıdır ki, bu iki qötənin orta nöqtəsi olsun.
Perpendikuliyarlıq üzrə hesablasaq, “A” və “B” nöqtələrindən keçən düz xəttin bucaq əmsalı mənfi 2.5-ə bərabərdir. Amma 3x+2y=26 düz xəttinin bucaq əmsalı mənfi 1.5-ə bərabərdir. Perpentikuliyarlıqda bu şərt vardır ki, bucaq əmsallarının hasili mənfi 1-ə bərabər olmalıdır. Bu şərt ödənmir. Ona görə də bu sual səhv salınıb”.
Lakin Dövlət İmtahan Mərkəzindən verilən cavaba görə, Riyaziyyat fənninə aid 83 nömrəli test tapşırığında yanlışlıq yoxdur:
“5 mart tarixli buraxılış imtahanının riyaziyyat fənnindən bütün variantlar üzrə sual kitabçalarında 83 №li test tapşırığı ilə bağlı daxil olan müraciətlər müvafiq fənnin ekspertləri tərəfindən araşdırılıb.
Bununla əlaqədar olaraq bildiririk ki, şagirdlərə təqdim olunan yazılı cavab tələb edən açıq tipli bu tapşırıq qüvvədə olan təhsil proqramı və dərsliklərdə yer alan və tapşırıqda yoxlanılması nəzərdə tutulan biliklər əsasında elmi-metodiki qaydalara uyğun şəkildə hazırlanan meyarlar əsasında qiymətləndirilə biləcək bir tapşırıqdır.
Məlum olduğu kimi, yazılı tapşırıqlarda şagirdlərin verdiyi cavablar cavab vərəqində yer alır və yoxlama əsnasında onların bilikləri cavablandırma üsullarından, hesablama prosesinin mərhələlərindəki qeydlərindən, səhvlərindən asılı olaraq tam, üçdə iki, yarım, üçdə bir olmaqla müxtəlif səviyyələrdə qiymətləndirilir. 5 mart tarixində keçirilən imtahanda istifadə olunan və yazılı cavab tələb edən bütün tapşırıqların qiymətləndirmə meyarları da müvafiq prosedurlar başa çatandan sonra elan ediləcək".