Təhsil eksperti – Məktəblərdə bu fənn mütləq tədris olunmalıdır

Tanınmış təhsil eksperti Elmin Nuri feysbuk hesabında orta məktəblərdə şahmat dərsinin ayrıca fənn kimi keçirilməsinin vacibliyindən yazıb. Onun fikrincə, gələcəyin təfəkkürlü şəxsiyətinə yönəlik təhsil sistemini düşünürüksə, şahmat fənni heç olmasa, həftədə bir dəfə əsas fənn kimi tədris olunmalıdır. 

Mektebgushesi.az xəbər verir ki, şahmatın niyə bu qədər vacib olduğu və şagirdlərə necə keçirilməsi barədə fikirlərini ekspert Demokrat.az-a açıqlamasında bölüşüb.

O bildirib ki, məktəb tək sosial mühit deyil, onun funkasiyası həm də fərdi şəxsiyyətə çevirməkdir:

“Təəssüf ki, bu gün məktəblərə yalnız universitetə qəbul prosesinə hazırlıq dövrü kimi yanaşılır. Uşaq ona görə məktəbdə oxuyur ki, universitetə daxil olsun. Məktəb fərdi şəxsiyyətə çevirən, insanı gələcəkdə şəxsiyyət kimi yetişdirən formulları üzə çıxaran bir tədris, tərbiyə, ən əsası özünüdərk məkanıdır. Bu gün həm də ona görə məktəbdən qaçırıq ki, o bizi analitik məlumatlarla yükləyir. Məktəb özünü sevdirə bilmir, nüfuzunu itirib, formal bir müəssisəyə çevrilib”.

E.Nuri deyib ki, şəxs düşüncə sahibi kimi yetişmək istəyirsə, situasiyaya görə ağıllı və operativ qərar qəbul etmək istəyirsə, şahmatı bilməlidir:

“Şagirdlərə keçirilən şahmat dərsi onun şüuraltında öz sözünü deyəcək. Məktəblərdə şahmat şüuraltı mexanizm, intellektin şüuraltı xidmətçisi kimi çıxış etməlidir. Bunu klassik şahmat dərslərindən fərqləndirməliyik. Akademik, qəliz üslubda tədrisə ehtiyac yoxdur. Kifayət qədər əyləncəli, maraqlı şəkildə keçirilə bilər. Burada yarışa çıxacaq insan deyil, daha məntqili, manevr qabiliyyətli, strateji düşünmə bacarığına sahib insan yetişdirmək üçün şahmatdan istifadə etməliyik.

Hazırlanacaq dərslikdə də bu xətt izlənilməlidir. Şahmatla bağlı bir çox əsərlər və filmlər var. Həmin dərslikdə bunlar öz əksini tapmalıdır. Bununla bağlı analitik məqalələr, şahmatın fəlsəfəsi, strateji tərəfləri vurğulanmalıdır. Şahmat və diplomatik təfəkkür, şahmat və intellektual təfəkkür, şahmat və İT məsələlərinə yer verilməlidir. Bundan qazanan təhsilimiz və cəmiyyətimiz olacaq”.